Novas

DÚAS ETAPAS O SÁBADO E UNHA O DOMINGO

O Xacobeo Galicia, disposto a brillar na Volta a Madrid

[ 16/07/2010 ] O Xacobeo Galicia está disposto para abordar a vinte e catro edición da Volta a Madrid, que comeza mañá sábado, ás 10.00 horas, cunha contrarreloxo na Casa de Campo. A formación do equipo galego compóñena: Ezequiel Mosquera, David García, Gustavo Domínguez, Serafín Martínez, Gustavo Rodríguez, Delio Fernández, Vladimir Isaychev e José Antonio De Segovia. Todos eles estarán dirixidos por Álvaro Pino.

O equipo agarda moi animado esta competición que marca o comezo de selección de corredores dentro do Xacobeo Galicia para a Volta a España. Iso significa que o nivel de forma non é aínda óptimo pero que está xa na boa liña, ata máis por mentalización e dispoñibilidade que por condición física.

Vladimir Isaychev, José Antonio De Segovia e Serafín Martínez buscarán un bo rexistro nos 8,1 quilómetros da contrarreloxo inicial na Casa de Campo. O mesmo sábado, en sesión vespertina, disputarase a segunda etapa sobre un percorrido de 84,8 quilómetros, con saída e meta na localidade de Coslada; e na que todos os integrantes do equipo intentarán aproveitar as súas opcións de vitoria.

A etapa raíña chega na matinal do domingo sobre un percorrido curto pero esixente, especialmente nos seus trinta e dous quilómetros finais, nos que o pelotón terá que superar o porto de Fuente del Collado, de terceira categoría, e a continuación o alto da Morcuera, de primeira, onde se sitúa a meta.

Nesta xornada Ezequiel Mosquera terá ocasión de medir a súa condición de forma ante rivais cualificados como o subcampión do Giro 2010, David Arroyo, Igor Antón, Intxausti e Anxo Vicioso, entre outros.